Бигерысь удмуртъёс "Пузкарез" учкозы

Афиша. Пузкар Урсы гуртын

29-тӥ гудырикошконэ Бавлы ёросысь Урустамак гурт клубын "Пузкар" киноез возьматозы. Кино бере егитъёс понна удмурт позыръяськон ортчоз.

Удмуртиысь удмуртъёслэн туала улонэнызы тодматонэн но позыръяськонъёсты ортчытонэн Урустамакын Павел Александров выре, тросэзлы со Шонер Павол нимын кырӟась кадь тодмо. Тани мар вераз Паша вуоно кино возьматон сярысь но удмурт лулчеберет сярысь: "Пузкар" кино - со туала удмурт лулчеберетлэн, улонлэн люкетэз. Мон малпасько, ми палан адямиос уг но валало, кыӵе перспективаос вань удмурт удысын. Нош киноез учкизы ке, оло со сярысь малпаськыны но кутскозы.Зэмзэ верано ке, кинолэн нимыз калыкмес серекъятӥз ни. Ой, та диалектъёсын!.. Но ми палан Удмуртиысь концертъёсты но ужрадъёсты туж шуныт пумитало. Малпасько, киноез возьматон но умой ортчоз, калыклы кельшоз. Тросэз жингыртыло ни, "Пузкар" сярысь юаллясько. Али лэсьтэм ужелэн емышъёсыз сярысь маке малпаны вазь на. Адямиослы туж трос дыр кулэ, удмуртлыкез валан но ас культурадэ гажаны кутскон понна. Школаямы мон пиналъёсты удмурт лулчеберетэн тодматӥсько бере, соос дорам кыстӥсько, юасько, гожъяло. Мон соосты "удмурт лулчеберетэз одно ик яратоно!" шуыса уг дышетӥськы, мон соосты удмурт лулчеберетэн тунсыкъятыны тыршисько, озьы емышез тросгес луэ."

Кино возьматон 19:30 часын кутскоз.

Тунсыко статьяос