Дэри ёросын Бадӟым удмурт диктант кык площадкаын гожтозы

БУД

12-тӥ оштолэзе (апреле) Элькун лицей-интернатын дышетскисьёс Бадӟым удмурт диктант гожтозы. Кутсконэз 12.00 часкын. Лицейын дышетскисьёсты сяна, та ужрадэ мыло-кыдо пыриськыны ӧтиськом лицеез йылпумъям нылъёсты но пиосты.

БУД лицейын кылем арын но гожтӥзы. Бадӟым удмурт диктантлэн 2013-тӥ арын кизилиез Иванова Светлана. 11-тӥ классын дышетскись нылаш 99 балл люкаса, лицеистъёс но вань диктант гожтӥисьёс пӧлын нырысетӥ луиз. Али Светлана УдГУ-ын мутодон (географи) факультетын дышетске. Ваньмыз ӧвӧлэн кылем арын диктант 25 лицеист гожтӥз.

Али БУД-2014 дасяськонъёс урыз-урыз мыно. Шумпотыса вераны луэ, Италмас черкогуртын но Якшур гуртын улӥсьёс туэ диктант гожтыны мылкыдзэс веразы шуыса. Соос понна нимысьтыз площадка усьтӥськоз – Италмас шор ёзо школаын.

Кылем арын БУД-эз нылпиос «Мынам Удмуртие» радио пыр гожтӥзы, нош та арын текстэз лыдӟозы лицейын, нылпиос азьын. Элькун лицей-интернатын диктантлэсь текстэ лыдӟоз Морозов В.Г., удмурт кылъя но литературая дышетӥсь, нош Италмас шор ёзо школаын – Рысаева Т.Л., Италмас шор ёзо школалэн директорезлэн дышетон удысъя воштӥсез.

Павел Вахрушев

Тунсыко статьяос