Выль тулыс «сяськаос»-модалиос

Удмурт сюан дэрем коллекция

Дуннеын тулыс. Ваньмыз сайка, улӟе. Тани удмуртъёс полын но усьтӥськизы выль сяськаос. 27 оштолэзе, арнянуналэ, выль усьтӥськем «Сахар» арт-пространствоын ортчиз «Эль ныл» удмурт модая фестиваль.

Учком та тунсыко ужрад шоры одиг тужгес но етӥз учкисьлэн синмыныз, кудӥз нимзэ ватыны косӥз: «Зэмзэ шуоно ке, мон туж пайми, ку монэ отӥзы удмурт мода возьматонэ. Удмурт концерт, удмурт кино кылэме вань, нош удмурт мода? Кыӵе ке суро-пожо мылкыдъёс кылдо. Озьыен, малпай мыныны, кызьы ке но ваньмон дырме быдтыны. «Сахаре» пырыса, нырысетӥ малпанэ вал: «Туж тунсыко». Аспӧртэмлыко дизайн но кыӵе ке предпраздничной омыр монэ шумпотытӥз. Калык нош кыстӥське но кыстӥське. Дыр ортчыса татын шокчыны но инты ӧз тырмы, сомында калык вуиз удмурт модалиос шоры учкыны! Ди-джей пульт сьӧрын егит Dj Gord Микол гурзэ шыпытгес кариз, но ваньзылы тодмо Алексей Бегешев но кылем арын «Эль нылэз» вормись муспотон Ирина Игнатева усьтӥзы возьматонэз. Час шӧдытэк ортчиз. Мон трос удмурт дизайнеръёслэн ужъёсынызы тодматски, кылӥ Эльвира Панченколэсь, Аня Камалилэсь, Ксения Тимеевалэсь но Олеся Дыдыкайлэсь паймымон кырӟамзэс. Туж шулдыртӥз «Чипчирган» ансамбль.

15 минут антракт бере ми нош ик паймыса учким чебер модалиосмы шоры но кылзӥм Белослудцев Иванэз но Мурӝол Андеграундэз. Нош тужгес сюлмаськымон, конешно, вал «Эль ныл» ним сётон. Вань пукисьёс шумпотыса учко вице-эльныл Юлия Лекомцева шоры но чупаны дась мусо егит вормисез Дарина Якимоваез. Залын сыӵе шуныт омыр ӝутскиз! Вань модалиос – ӟечокъёс!

Зэмзэ верано ке, мон уг малпаськы вал, асьме Удмурт шаерамы таӵе ужрад быгатэ луыны шуыса. Мон удмуртъёс шоры мукет синмын ик учкыны кутски кадь. Зэм шуо: «Удмуртъёс туж таланто но быгатӥсь муртъёс, но туж востэмесь. Мон малпамея, таӵе ужрадъёс тросгес ортчытъяно удмуртъёслэсь туж узыр луэмзэс возьматон понна». Тани кыӵе малпан кылдытӥз «Эль ныл 2014» учкисьмылэн йыраз. Мон соин одно ик соглаш луисько. Та ужрад усьтӥз калыклы трос выль нимъёс. Туж бадӟым тау шуоно со понна милям яратоно Дарали Лелимылы. Со кадь кужмо, таланто но тунсыко кышномуртъёс Удмурт шаерлы туж кулэ!

Женя Корепанова
Туспуктӥз: Наталья Дмитриева

Тунсыко статьяос