Удмурт кыл - ивор сётӥсь ёзъетъёсын: теория но практика

10-тӥ толсуре УдГУ-ысь журналистика факультет  ортчытӥз конференция, кытын тодосчиос но журналистъёс нимысьтыз эскеризы ивор сётӥсь ёзэтъёсын удмурт кыллэн кызьы кутӥськемез сярысь ужпумъёсты. Кыл котьку но общество но политика удысъёсын  воштӥськонъёслы аспӧртэмлыко индикатор луэ. Удмурт кыл удысэ  но берло аръёсы трос гинэ выль кылъёс выль оборотъёс пыризы. Кудъёсыз соос озьы ик кутӥсько, кызьы ӟуч кылын, кудъёсыз берыктӥсько. Кыл узырме диалектъёсыь но вашкала кылысь омыртэм лексикаен. Котькудӥз удмурт ёрос газет, кылсярысь,  ас ужаз паськыт кутэ ас диалектсэ.

Туала ивор сётӥсь ёзэтъёслэн кылпӧртэмлыксы  сярысь, озьы ик радиоын но телевидениын кутиськись удмурт кыл сярысь мур доклад ыстэм Хельсинкиын али  улӥсь философия доктор С.Н. Едыгарова.  М.А. Самарова  эскериз интернет вотэсэ удмурт кыллэн кызьы пыӵамез сярысь, нош  С.Н. Широбокова (Ижевск) усто  суред кылдытӥз «Ошмес» (Якшур-Бӧдья) газетлэн  кылызлы. С.Т. Арекеева но В.Л. Шибанов эскеризы «Гудыриын» но «Удмурт дуннеын» удмурт кыллэсь пӧртэм жанръёсын кызьы кутиськемзэ.

Г.Н. Шушакова возьматӥз «Удмурт дуннелэн» бамъёсаз христианствоен герӟаськем лексикаез. Малы, мадиз со, «Бог» кыл куке берыктӥське «Инбам эксэй» шуыса, мукетъят – «Инмар» шуыса. Выль кыллюкамъёс, мукет кылъёсысь асэстэм кылъёс,  выль кылъёс кылдытон пумысен докладъёс лэсьтӥзы, Т.Р. Душенкова,   И.В.Тараканов, Р.Ш. Насибуллин.  А.А. Шкляев «Малпа выль кыл» ӵошатсконлы йылпумъянъёсын  тодматӥз.  

Конференцилэн шорсюлмыз вал теоретикъёс но практикъёс куспын тэкшерон (дискуссия). Ужпум со бордын: гожъяськон удысын кутэм правилоос кыл тодос (наука) азинскемъя выльдӥськизы ни бере, али кин кызьы гожъяське. Со ласянь пайдалыко вал профенссор В.К. Кельмаков но «Удмурт дуннелэн» редакторез З.К. Рябинина куспын лэчыт диалог. Конференциын кутэм трос дэмланъёсын резолюция ыстэмын луоз властьёслэн пӧртэм струкраосаз. Со дэмланъёс пӧлын – «Ӟуч-удмурт кыллюкам» лэсьтон, «Удмурт-ӟуч кыллюкамлы» ватсаса тираж поттон, «Удмурт кылэз эскерон но утён комиссия» кылдытон но мукет.

Конференцилэн материалъёсыныз нимысьтыз бичет (сборник) поттэмын луоз.

Тунсыко статьяос