"Кебит Возьмась Awards-2013" антиданъян шедьтӥз аслэсьтыз вормисьёссэ

Кебит Возьмась

Та дырлы удмуртъёс пӧлын «Кебит Возьмась Awards-2013» нимо антипремилэн вормисьёсыз тодмо луизы. 16-тӥ толшоре Пепелац клубын соосты шараяз но нимысьтыз Антиданъянъёсын пусйиз Павел Поздеев. Куара сётон ортчиз интернет пыр куинь номинациосъя: «Экекек…» нимо номинациын вормисе потӥз удмурт кылын мерлыко-гольыко дырпус. Кыкетӥ интыез люко ТК «Моя Удмуртия», кудӥз уг тыршы передачаосызлэсь ӟечлыксэ будэтон бордын но Удмурт кылосбуръя факультетын ичи наборен кылдэм югдур. Куинетӥ интые сюризы «Перепечкин» кафеысь официанткаос, нылашъёс паймытӥзы ресторанлэсь этикетсэ тодымтэенызы но Юмшан-промо группалэн ужъёсыныз тунсыкъяськымтэенызы. 
«Куашетон» номинациын нырысетӥ интые потӥзы Валерий Кудинов но Артём Тараненко «Бобья-Уча Контемпо» проектлэн дурбасьтӥсьёсыз, удмуртъёсты мыскыллямзы но быдтыны тыршемзы понна; кыкетӥ интыын удмурт песянайлы пуктэм синпелет котырын ӝутскем ужпумъёс; куинетӥ интыын мерлыко-гольыко дырпус сярысь ченгешонъёс.
«Возьытлык» номинациын нырысетӥ интые потӥз асьсэлэн удмуртъёслэн ик удмурт кылэз вань школаосын дышетыны соглаш луымтэзы; кыкетӥ интые нош ик потӥз мерлыко-гольыко дырпус; куинетӥ интыез люко удмурт анай-атайёс, кудъёсыз чик но уг сюлмасько нылпиоссэс удмурт кыллы дышетыны но Суворова судья, кудӥз пумит султӥз судебной кылзонъёсты удмурт кылын нуыны.

Тунсыко статьяос