ВДВ понна яке кызьы ортчиз "Сайкыт ИнБам"

Сайкыт Инбам2-тӥ гудырикошконэ Алнашын Туала удмурт лулчеберетлы сӥзем нырысетӥез "Сайкыт ИнБам" фестиваль ортчиз. Та фестивальлы реклама котькытын ӟуч кылын сётэмын вал. Озьы ке но, фестивальысь ӟуч кылын вераськисьёсты шӧдыны ӧз но луы кадь, калык отын но, татын но удмурт кылын шалтыр вераськиз. Алнаш - со тужгес но удмурт ёрос ук! Соин ик али но валантэм, малы реклама ӟуч кылын гинэ вал. Серем соиз но, та фестивалез радъясьёс шуизы вал, ужрадмес алнашъёслы гинэ лэсьтӥськом шуыса. Удмуртъёслы удмурт реклама кулэ. Ма собере, фестивале тросэз мукет ёросъёсысь но, Ижысь но, Татарстанысь но вуиллям - ваньзы ик удмуртъёс!

Мастер-классъёс но кырӟамъя ӵошатсконъёсты верано ке, лыктэм калык шоразы таӵе тусын учке ни вал кадь: Ку та ваньмыз быроз но позыръяськон кутскоз ни? Ӵошатскись кырӟасьёс нош воксё абдратӥзы! Пӧлазы туж ӧжытэз кырӟаны быгатэ, нош кырӟа ке но, сцена вылын асьсэдыз воземзы уг луы на. Эшшо ке микрофонлэн золэз туж ӧз тырмы.

"Эктоника" кутскыку, калык копак ӟонгырамын вал ни. Пӧлысьтызы вакчи дэремъёсын сылӥсь нылъёс шоры учкыны ик кышкыт вал. Учкид гинэ но, вылыд ик ӟазег вылтыро луиз кадь. Бррр! Ярам, тани Электроникъёс но потӥзы но шудыны кутскизы. Петя Пушкин но калыкез бурдъяны тыршиз. Пӧрмиз кадь. Но кыӵе ке лултэм ваньмыз потӥз. Ог дышемъя кырӟазы Котельников но Тимерханова, одӥг кадь кырӟанъёсты кӧня ке пол лэзьязы Электроникъёс... Пичи сцена бордын мушъёс кадь бичаськемын вал вдв-ос. ВДВ - соиз воксё мукет вераськон! Сцена вылэ олокӧня пол тубыса тэтчазы, кин ке тыпыртыны но вуиз кадь. Куншетсы но эктӥсьёслэн йыр вылтӥзы ялан солань-талань лобаз. Пушкин но олокӧня пол соосты ӟечкылам кариз. Собере со вдв-ос жугиськыны но вуизы кадь. Огпол гинэ ӧз, олокӧня пол! Котырысьтызы эктӥсьёс соку ик пӧртэм интыосы сцена дорысь пегӟылӥзы. Сое ас синмын адӟоно вал! "Сайкыт ИнБам" - туала удмурт лулчеберетъя фестивальысь вдв-ослэн праздниксылы пӧрмиз кадь. Толерантной удмуртъёс талы пумит ӧз луэ.

Электроникъёсты воштӥзы Алнашысь диджейёс. Митрошин вынъёс - соос ик та ужрадэз радъясьёс. Рекламазы ӟуч кылын гинэ вал бере, таослэн шудэмысьтызы но номыре удмуртсэ кылыны ӧз луы. Пумаз гинэ, куке диджей пультсы тӥяськылӥз, ӝуатылӥзы Иван Котельниковлэсь одӥг кырӟанзэ, со сяна номыр удмуртэз ӧй ни вал. Паймемысь уд дугды кадь та вынъёслы...

Сценалэсь палэнэ учконо ке, воксё но серекъяса кулод. Фестивальлэн ортчоно лудэз кенерен котыртэмын вал бере, билеттэм калык кенер сьӧрын сылӥз. Зоопарке лыктэмъёс кадь соос кенерен котыртэмысь позыръяськись калык шоры учкыса сылӥзы. Оло эктӥзы но, крезьгур соос дорозь но кылӥське вал ук. Сопалан ик «Mademoiselle Oudmourte» модельной агенствоысь нылъёс дӥсьсэс вошъяса сылӥзы. Соослы нимаз палатка но пуктэмын ӧй вал. Куанеръёс...

Воксё кынмемъёс но сютэмъёс понна "Ялыке" кафе вузкариз. Таиз понна бадӟым тау, кынмыса пельёс усьыло ни вал, нош татын пӧсь чай вал!

Озьы ортчиз вдв-ослэн... ой, вождэс эн вае, туала удмурт лулчеберетлы сӥзем "Сайкыт ИнБам" фестиваль. Ужрад бырем бере пель сьӧрын ялан кылӥськиз на кадь: ВДВ понна! Нош кулэ, дыр, вал: Удмуртъёс понна...

Кати Иванкова

Тунсыко статьяос