Шаркан ёросын «Вераськиськом удмурт кылын» акциялы кутскиз

BgGNlMBcbVw

Шаркан ёрос Удмурт Элькунысь тужгес удмуртэз луэ ке но, арысь аре ӟучомыны сётиське. Ульчаосысь, вузкаронниосысь, портэм учреждениосысь шергес удмурт кылэз кылыны луэ ни. 
Шарканчиос удмурт кылын тросгес но кер потытэк мед вераськозы шуыса, туннэ ёросын «Вераськиськом удмурт кылын» акциялы кутскон сётэмын вал. Кутскыны Шаркан ёрос эмъяськонниысен малпамын. Эм юртлэн валтӥсь врачез, Перевощиков Ю.Г. вера:
- Оо, тросэз врачъёсмы, удмурт ке но луо, висисьёсын ӟуч сямен верасько. Удмурт кылын но вераськисьёсыз ичи ӧвӧл но, ӟученгес кенешыло. Та наклейкаос юрттэмен, удмурт кыл больницаын тросгес чузъяськоз шуыса оскисько.
Нырысетӥ «Вераськиськом удмурт кылын» наклейкаез Юрий Геннадиевич кабинет ос вылаз ачиз лякиз ни. Ӝоген эм юрт ог 100 пала наклейкаослэсь вуэмзэ вите. Валтӥсь врачлэн верамезъя, соосты Шаркан ёрос больницаын лякылон сяна, гурт ФАПъёсы но участковой больницаосы но келялозы. 
Озьы ик, «Удмурт кенеш» огазеяськонлэн Шаркан ёросысь ячейкаез 25 наклейка туннэ басьтӥз. Удмурт кенешчиос лулчеберет удысын тыршисьёс полын вӧлмытыны тыршо. 
Азьланяз, Шаркан РАЙПО кивалтэтэн ог кыл кутыса, оскисько, наклейкаос огазеяськонлэн вузкаронниосаз но сиськонниосаз луозы шуыса.

Павел Вахрушев

Тунсыко статьяос