Школа юртэ ӟучомыны

Павел Вахрушев

 

Дауръёс ортчемъя, дунне вылысь пӧртэм калыкъёслэн кылъёссы но ышо. 21-тӥ даур нырысетӥ дас аръёс куспын гинэ уно кылъёсты ӧвӧлэ кельтӥз ни. США-ысь тодосчиослэн эскеремзыя, ог 14 нунал куспын дунне вылын одӥг кыл бырыны шеде. Озьы ик азьланяз мынӥз ке, 21 даурысь дуннемы ӝынызэ кылъёссэ ыштыса кельтоз. 


Жаляса верано луэ, удмурт кылмы быроно кылъёс пӧлы пыртэмын ни. Туннэ нуналэ асьме кужымын на утьыны анай кылмес, нош мар луоз ӵуказе – вераны шугъяськисько.

 

Малы удмурт школаосын вань ужрадъёсты
ӟуч кылын ортчытъяло?

 

Удмурт Элькунын арысь-аре удмурт кылэз дышетӥсь нылпиослэн лыдзы кулэсме. Чылкак удмурт луись гуртъёсын но нылпиос анай кылзэс дышетонлэсь палэнско. Со интые ЕГЭлы дасяськыны тросгес дыр висъяло. Валтӥсь мугез – удмурт кылэз кулэтэмен лыдъян. Озьы учконо ке, котькуд кыкетӥез удмурт кылзэ дышетэмысь дугдӥз ке, кызьы анай кылмес паськытгес кутыны быгатом?


Нокызьы но валаны уг быгатӥськы на, малы удмурт школаосын вань ужрадъёсты ӟуч кылын ортчытъяло? Удмурт кылэз валасьтэмъёсыз ӧвӧл ук! Малы бен одно ик ӟуч кылын нуоно? Тужгес но Шаркан ёрослы вазиськеме потэ, малы ке шуоно та ужпум ёросын туж лэчыт сылэ.


Мынам удмурт кыл – анай кылы. Мынам улонам со туж бадӟым инты басьтэ. Вань кылъёс пӧлын со мынам нырысетӥ интыын сылэ. Тросэз удмуртъёс асьсэлэсь вордӥськем, анай кылзэс – ӟуч кылэз шуо. Серем гинэ потэ на, озьы верамзылы.

 

Удмуртъёс тросэз серем улэ шедё,
ӟуч сямен шонертэм вераськеменызы.

 

Гуртысь кошкем удмурт нылпи вакчи дыр куспын ӟучомыны быгатэ. Мон 3-тӥ арзэ ни вордӥськем гуртэлэсь палэнын, Дэри ёросысь Италмас черкогуртын дышетскисько. Удмуртъёс тросэз серем улэ шедё, ӟуч сямен шонертэм вераськеменызы. Соин ик куд-огез ас кылзылэсь но калыкезлэсь возьдаськыны кутско, куддыръя сое поттэмзы но уг поты ни. Кылсярысь, Элькун-лицей интернатын 9-тӥ классын мынам классам удмурт кылэз 40 адями полысь 17-мез дышетиз, нош 11 классын 14 кузя гинэ кылимы. Куинез удмурт кыл интые шаертодонъя предметэ выжизы. Удмурт кылэз тодӥсьёс пӧлысь но ӝыныезлэсь тросэз удмурт кылын урокын гинэ верасько, нош огъяулонниын – котьку ӟуч сямен. 

Ӟучомонэз мон ас вылам но туж зол шӧди. Кема гуртам бертылытэк, удмурт кылъёсты вунэтыны кутсконо, йырысь соос кошко. Нош ӟучомон процессэз дугдытон амал шедьтэмын – удмурт газетъёс лыдӟыны, удмурт кылын потӥсь иворъёсты учкыны, мерлыко вотэсъёсын но улонын тросгес удмурт кылын вераськыны.

Йылпумъяса вераме потэ, удмурт кылэз дышетон – туннэ нуналлы удмуртъёс азьын сылӥсь валтӥсь ужпум луэ. Анай кылэз дышетонлэсь данзэ, кулэлыксэ, пайдазэ газет-журналъёс, ТВ но Интернет пыр ӝутоно. Удмурт кылмес гажаса, яратыса но дышетыса гинэ кылмы сяськаяськыны быгатоз.

Татысь

Тунсыко статьяос