Шудон корка вӧлмытэ ужрадзэ ёросъёсын

«Удмурт нылкышно кенеш» мерлыко огазеяськон юрттэмъя, «Шудон корка» семья клубъёс ужаны кутскизы ёросъёсын но. Толон, 13-тӥ оштолэзе, Нылкышно кенешчиосты ӧтчазы Дэри ёросысь Хохряки гуртысь «Шудон коркае».

Клублэсь ужзэ радъян борды мылысь-кыдысь басьтӥськизы Черепанов кузпалъёс. Ирина ужа Хохрякиысь спортъя но лулчеберетъя комплекслэн кивалтӥсезлэн воштӥсез луыса, Сергей – нылпи садысь крезьгуръя дышетӥсь. Шудон коркаязы куинетӥ пумиськонзэс cӥзизы Паска (Будӟыннунал) шудонъёслы.  
Хохрякиысь нылпи садлэн актовой залаз люкаськизы удмурт пиналъёс но анай-атайёс. Ужрадэз нуись Ирина Черепанова вакчияк тодматӥз. кызьы пумитало вал Паскаез удмуртъёс. Ваньзы ӵош  –  пиналъёс но, анай-атайёс но, удмурт шудонъёсын шудӥзы. Нош кызьы но уг луы вылэм шудыны курегпузэн - питыръяса но, пуньыен нуллыса но, ваткаса но, ог-огедлы кругъя сётъяса но! 
Собере пиналъёс удмурт кылын «Сяртчы» выжыкылэз шудӥзы. 
«Шудон коркалэн» валтӥсь ужпумез –удмурт кылэз волятон, удмурт кылмылы пичи дырысен гажан мылкыд пыӵатон.  Шудэм улсын  пиналъёс тодэм кылъёссэс но шумпотыса веразы, выльёссэ но дышетӥзы. Шудэм-верам сяна, анай-атайёсынызы ӵош киуж но лэсьтыса вуттӥзы – бумагалэсь чеберъям курегпуз.
Шудон коркаез радъясьёслы нимысьтыз тау кылъёссэ вераз Нылкышно кенеш правленилэн ёзчиез, Ижкарысь воспитательёслэн «Зарни бугор» клубенызы кивалтӥсь Ольга Аркашева. 
Удмурт нылкышно кенешлэн кивалтӥсез Надежда Степанова кенешиз анай-атайёсын, кудбыдӟа инты басьтэ пиналлэн улоназ анай кыл. Пусйыны кулэ, Хохряки гурт пыриське  «Удмурт кыл муниципал кылдытэтъёсын» ӵектосэ. Гурт администрациен ӵош Нылкышно кенешчиос уж нуозы, та гуртысь нылпи садазы удмурт группа усьтонъя но удмурт кылэз дышетонэз школаязы радъянъя.

Тунсыко статьяос