Удмурт егитъёс 21-тӥ даурын

6-тӥ толсуре, Эшъяськон юртын ортчиз улоскуспо конференция "Удмурт егитъёс 21-тӥ даурын". Ужрад кыкетсэ Удмурт, Татарстан, Башкортостан, Марий Эл Элькунъёсысь но Пермь, Киров, Свердловск улосвылъёсысь егитъёсты люка. Таӵе пумиськонэз радъяны ӵектӥз Камсьӧр удмуртъёслэн Удмуртиысь огазеяськонзы. 

Мон нырысьсэ та выллем ужрадэ пыриськи.  Туж тунсыко  пӧртэм улосвылъёсысь нылпиос тодматскыны, соослэсь удмурт кылын вераськемзэс кылзыны. Конференция ортчиз Эшъян юртлэн Бадӟым кенешон бӧлетаз (конференц.зал), кудаз аслэсьтыз кенешонъёссэ ортчытъя Элькун Тӧро но кивалтэт. Заллэн чильк-валь каремез эшшо но золгес сюлмаськытӥз на, дыр, нылпиосты. 

Ужрад кутскиз "Пурга кизиослэн" адӟытонэнызы. Соос пӧртэм тунсыко суредъёс-проектъёс лэсьтӥллям. Искусстволэсь кыдекын адямилы нырысь-валысь валамтэ но потоз, дыр, мар суредамын но борддор вылэ ошемын. Нош мургес малпаськыса, суредасьёслэн малпанэз шараяське. Люкаськемъёс азьын вераськиз соослэн кивалтӥсьсы, Галиханов К.Ш.. 

Кенешон бӧлетын конференцие лыктэмъёс азьын Егитъёсын ужанъя министр, Соловьев В.М., Йӧскалык политикая министрлэн воштӥсез, Царегородцева О.В., Камсьӧр удмуртъёслэн огазеяськонэнызы кивалтӥсез, Чибышева Ф.А. но мукетъёсыз вераськизы. Ваньмыз ӧвӧлэн пленарной заседание куспын ог 18 доклад верамын вал: удмурт орнамент дорысен Удмуртилэн палэназ нырысетӥ удмурт гимназия кылдытон ужпумъёс дорозь. 

Собере нылпиос асьсэды секциосын ужаса эскеризы. Люкаськемъёс  этномода сярысь вераськизы, учкизы "Ватка" театральной стидие ветлӥсь студентъёслэсь "Матӥ но Мардан" спектакльзэс, ужбергатонын удмурт шӧм сярысь кенешизы но К.Герд нимо гимназиысь "Уморто" медиа-центрен тодматскизы.

Та выллем ужрадъёс удмурт егитъёсты огазеяны быгато. Ачид вераськыса, мукетсэ кылзыса, эшшо но золгес валано на удмурт луэмез, удмуртлыкез яратэмез.

Павел Вахрушев

Тунсыко статьяос