Удмурт-эстон лыдӟонъёс

17 толшоре "Мумыдор усадьбаын" удмурт-эстон лыдӟонъёс ортчозы. 
Куное вуо эстон гожъяськисьёс, кылбурчиос Ян Рахман но Contra, озьы ик шаерамы бертэмын Эстониысь удмурт кылбурчимы – Муш Нади. 

Ян Рахман (Jan Rahman,1975) – выру гожъясьчи, кылбуръёс, веросъёс, пьесаос, статьяос гожъя. Пыриськиз Тартуысь егит авторъёслэн NAK огазеяськонлэн, Выру огазеяськонлэн ужаз. Радъя выру кыллы но культуралы сӥзем ужрадъёс. Выру кылэ берыктӥз эстон кылбурчиосты, Шекспирлэсь «Гужем уй вӧт»-ысьтыз люкетсэ. Гожъя кырӟанъёс. Солэн кылбуръёсызъя кылдытэм кырӟанъёсты кырӟало «Ummamuudu» но «Viie pääle» ансамбльёс, тодмо кырӟасьёс Яак Туксам но Мари Калькун.

Contra (Margus Konnula, 1974) – Эстониысь котькинлы тодмо кылбурчи, вордӥськемын Урвастеын агрономлэн но экономистлэн семьяязы, ужамын англи кыллы дышетӥсь но почтальон луыса. 1999-тӥ арысен Contra эрико гожъясьчи но сценарист луэ. Ужаз Урвасте ёрос газетлэн редакторез луыса. Телепередачаослы сценарийёс но кырӟанъёс гожъяз. Тартуысь егит авторъёслэн NAK, Эстониысь гожъясьчиослэн огазеяськонзылэн ёзчиез луэ. Гожъяны кутскиз серемес калык кырӟанъёслэсь адӟем карыса. Туннэ нуналлы солэн 24 книгаез потэмын ни. Contra-лэн ужез пусъемын уно премиосын, соос пӧлын таӵе бадӟымъёсыз но: Бернард Кангро нимо литература премия, Оскар Лутслэн юмор премиез.

Надежда Пчеловодова (Муш Нади) – удмурт кылбурчи, кылысь кылэ берыкъясь. Кылбуръёс гожъяны школаын дышетскон аръёсаз гожъяны кутскиз. Кылбуръёсыз-веросъёсыз печатласькизы удмурт газет-журналъёсын: «Удмурт дунне», «Инвожо», «Вордскем кыл». Нылпиослы «Му-гур» пичильтык книжкаез потэ. «Осконэ мынам», «Эрике мынам» нимо кылбуръёсын бичетъёсыз потӥзы. Надежда Пчеловодова бадӟым уж лэсьтэ берыктон уж бордын. Туннэ нуналлы даслэсь трос эстон авторъёс удмурт кылэ берыктэмын, нимысьтыз книгаосын потэмын. 2007 арын Эстон литературной премиялэн лауреатэз луиз.

Ужрад кутске 16 часын. «Мумы Доре» вуоно 356 автобусэн Северный микрорайон дугдылонниысен Нагорный остановкаозь. 
Отысен та автобус кошке 18:30 часын, бергес бертыны мылкыд карисьёс машина пумысен сюлмаськоно луозы.

Мария Золотарева

Тунсыко статьяос