Вераськиськом удмурт кылын

«Удмуртлык» огинлык  но «Шунды» огазеяськон но элькунын «Вераськиськом удмурт кылын» акция радъя. Ог 400 чибориё наклейкаос Удмурт Элькунысь вузкаронниосын, эм, лулчеберет но дышетскон юртъёсын интызэс шедьтӥзы ни. Табере котькуд лыктэм мурт тодэ: татын соин удмурт кылын но вераськыны быгатозы. Ужрад тужгес но мыло-кыдо Ижкарын но Шаркан ёросын радъяське. 
Выль но тунсыко проект ас бордаз кыске, соин ик калык мыло-кыдо акцие пыриське. Ӵемысь огазеяськонъёс асьсэос вазисько, уж дуразы наклейка курыса. Кылсярысь, Ижкарысь «Яблок» магазин, «Нестандартные решения» огазеяськон, «Ӟечбур!» газет но «Удмуртия» книгапоттонни уж интыязы наклейкаос лякизы ни. Вераны кулэ на, наклейкаос дунтэк сётисько шуыса. Котькуд мылкыд карись мурт акциез азьланьтыны уксё сетыны быгатэ на. Радъясьёсьёслэн верамзыя, сыӵе адямиос вань. 
Толэзь ӵоже «Вераськиськом удмурт кылын» акция Шаркан ёросын радъяське. Ёрос элькунысь тужгес удмуртъёсыз пӧлы пыре ке но, арысь-аре черкогуртын но быдэс ёросын удмурт кыл ичигес кылӥське. Валасьёсыз трос, нош вераськиськыны кепырало, я уг быгато. 
Толэзь куспын ёрос огазеяськонъёсы, вуз карон интыосы, эм юртъёсы 200 пала наклейка люкемын. Тужгес но мыло-кыдо акцие пыриське Шаркан ёрос эм юрт. Юрий Перевозчиков, валтӥсь эмчи, «Вераськиськом удмурт кылын» наклейкаез ӧс вылаз лякемез бере, шумпотонзэ уг ваты:
- Ужасьёсмы пӧлын удмурт кылэз тодӥсьёс трос, но ӵемысь эмчиосмы ӟуч сямен верасько. Нош висисьёслы удмурт кылын ик висёнзэс лякыт вераны. Котькуд эмчилэсь удмурт кылэз тодэмзэ уд ни юа. Наклейкаосъя нош валамон ни, кытын тонэн анай кылын вераськыны быгатозы.
Эмчиос пӧлын акциялы пумит луисьёс ӧвӧл. Удмурт кылын вераськись ӧнерчиос кабинет ӧс вылазы «Вераськиськом удмурт кылын» наклейка лякизы ни. Висисьёс но шумпото, висёнзы сярысь эмчиен анай кылын вераськыны быгато шуыса. Ӝоген таӵе наклейкаос ёросысь 33 гурт эмъяськонниосы но 2 участкой эм юртъёсы вуозы на. 
Ёросысь «Удмурт кенеш» наклейкаосты лулчеберет удысын ужасьёс пӧлын волмытӥз. Озьы ик, акцие пыриськыны гурт Администрациос но мылкыд каризы. 
Азьланяз «Вераськиськом удмурт кылын» наклейкаосты тросэн мукет черкогуртъёсысь но каръёсысь адӟыны луоз. 

Паша Вахрушев

Тунсыко статьяос