«Кечол ӝытъес»: гуртысь егитъёслы удмурт ужрадъёс уг тырмо

Ортчем кӧснуналэ, 6 толсуре, «Кечол ӝытъес» промо-группа 1 арзэ пусъиз. Та лыдпуслы сӥзьыса, Кечолын ортчиз концерт.

«Кечол ӝытъёс» - эрико промо-группа, удмурт шӧмо ужрадъёс радъясь. Витьымтэ шорысь кылдӥз кылем арын, толсуре – «анаезлы», Маша Золотарёвалы , луиз мӧзмыт бертылыны вордскем гуртаз, Кечолэ. "Гуртын ужрадъёс ӧз тырмылэ, егитъёслы вал нокытын «культурно» но удмурт шӧмо шутэтскыны", маде Маша.  Ар куспын «Кечол ӝытъес» поталлязы концертэн пӧртэм гуртъёсы: Улӥ Юрие, Изгуртэ, Совхозное, Шор Постолэ но Ожмосэ-школаосын ортчемъёсыз; Кечолэ, Аксакшуре, Ильинск-Учае, Мартьяные, Подшиваловое, Юськие, Бадӟым Веньяе но Брангуртэ-клубъёсын ортчемъёсыз.

Берпуметӥ ужрадэ пыриськизы Иван Белослудцев, Алина Антонова, Уллапала Бой но Александр Ашихмин. Озьы ик «Кечол ӝытъес» ужрадъёсын кырӟазы Марина Михайлова,  Андрей Конышев, Аня Камали, Костя Никитин.

"Мыным туж кельше пыриськыны «Кечол ӝытъёс» промо-группалэн концертъёсаз, - Алина Антонова, кырӟась вера. Со тунсыко, маиз ке вань та ӝытъёсын бордаз кыскисез. Куке Маша Золотарева ӧте концертэн сояз яке мукетаз гуртэ, тыршисько мыныны. Бадӟым концертъёс сяна, таӵеосыз но одно ик кулэ. Нырысь пичияк концерт, бӧрысь позыръяськон-дискотека. Кулэ пусйыны Маша ӵемысь выль, ӝужась кизилиосын ужа, гурт калык соосын но одно ик мед тодматскоз шуыса, нош милемлы, артистъёслы, со эшшо но трос муг калыклы кырӟаны, солы пальпотыны, капчи мылкыд кузьманы. "Домашний", шуныт шуысал мон луо та Кечол ӝыт концертъёс.

 

Кечол  ӝытъёслэсь ужрадъёсаз ар куспын
1,5 сюрс адями пыриськиз

 

Уллапала Бой малпамезъя «Кечол ӝытъёс» - со туж умой малпан. Кечол ӝытъёс - удмурт event-агенство, концертной promo-групп, кытын ваньмыз лэсьтӥське "аслад кужыменыд но аслад киосыныд", тужгес но Машалэн кужыменыз. Со радъясь но, туспуктӥсь но, нуись но. Кечол ӝытъёс проект возьматӥз, мылкыдыд вань ке, тон ваньзэ быгатод лэсьтыны ачид, абсолютно ваньзэ... Лэсьты, кар, малпа. Кыӵе, кылсярысь, школаын дышетскисьёс шумпото, тунсыкъяскыны кутско удмурт туала культураен, "Кечол ӝытъёс" ужрадъёс бере! Со туж но туж кулэ ук, зэмзэ вераса.

 

Ачиз Маша азьланяз ужрадъёсызлэсь ӧрзэ кӧня ке воштыны малпа. Кылсярысь, дискотека азьын «котырес ӝӧк» ортчытыны, кудъёсаз ӝутӥськозы удмурт кылмылэн кудпала воштӥськемез, удмурт артистъёс сярысь вераськонъёс, удмурт лулчеберет но мода, удмурт ужрадъёс сярысь кенешонъёс. Озьы ик малы кулэ тодыны удмурт кылэз но малы лыдӟоно удмурт литератураез?

Та дырлы Машалэн вань одӥг лемлет малпанэз-со басьтыны азьланяз кӧня ке но умой аппаратура, малы ке шуоно школаосын та ласянь кылдыло шуг-секытъёс, кудъёсыз герӟаськемын аппаратуралэн урод качествоеныз.

 

Лиза Шихова