Удмурт калык аслэсьтыз дурбасьтӥсьсэ «ыштӥз»

Ижкарын журналистлы, писательлы, удмурт калык понна дурбасьтисьлы Владимир Короленколы азьло дыре сылэм синпелетэз вӧзы тодмотэм адямиос венок поныса кельтӥллям. Озьы ик театрлэн укноосаз гожтӥллям на: «Короленко урам. Короленкоез интыяз берыктэ».

Владимир Короленколы сӥзем синпелетэз 11 шуркынмонэ 2013 арын куштэмын вал. Таӵе воштӥськонъёс герӟаськемын шоркарысь Пастухов урамын сюресэз лэсьтонэн но ӟуч театрез сэрттонэн валлин. Азьло сылӥсь театр интые кар но кун кивалтӥсьёс Автовокзал интыяны малпало.

Соин валче та учыр котырын пӧртэм вераськонъёс вӧлмыны кутскизы. Уго Владимир Короленколэн нимыз удмурт калыклэн историеныз зол герӟаськемын. Со Кизнер ёросысь Вуж Мултан черкогуртысь улӥсьёсты пытсэт улэ сюронлэсь мозмытӥз. Сотэк удмуртъёс шоры али ке но виылӥсьёс шоры кадь учкысалзы, дыр. Нош Короленколэн но солэн эшъёсыз сюлмаськемен, асьме калык чылкытэ потӥз.

Элькунысь культурая, печатья но ивор вӧлмытон ёзэтъя министерство валэктэ - али синпелет йӧскалык музее нуэмын. Кытчы Владимир Короленколэн синпелетэз бӧрысь интыямын луоз - тодмо ӧвӧл на.

Наталья Михайлова
Туспуктӥз Леонид Гонин